P-06-1226 Dileu'r hyn sy'n rhwystro mynediad i waith
cymdeithasol ac annog parch cydradd rhwng gofal cymdeithasol ac
iechyd, Dogfen Briffio – Deisebwyr at y Pwyllgor,
17.01.22
Dogfen briffio ar gyfer y Pwyllgor Deisebau gan Ymgyrch Bwrsariaeth MASW
Y Sefyllfa Bresennol
Mae'r gweithlu presennol yn un sy'n heneiddio, gyda dros 50% o'r gweithlu dros 45 oed a 24% dros 55[1]. Mae’r gweithiwr cymdeithasol arferol yng Nghymru yn wyn, benywaidd, a 46 mlwydd oed. Y gymhareb benyw i wryw yw 5-1 ac mae 88% yn wyn Prydeinig, ac mae gan 3% anabledd[2]. Mae'r angen i recriwtio gweithwyr cymdeithasol newydd yn hollbwysig. Mae’r data diweddaraf yn dangos, dros y ddwy flynedd rhwng 2018-2020, bod 516 o fyfyrwyr wedi cofrestru ar y gofrestr, gyda thros draean, sef 154, yn fyfyrwyr MA[3]. Fodd bynnag, gadawodd 20% o fyfyrwyr y gofrestr, gyda'r mwyafrif yn nodi rhesymau personol ac iechyd.[4]
Mae'r MA mewn gwaith cymdeithasol yn gwrs dwy flynedd llawn amser; fodd bynnag, mae'r rhan fwyaf o fyfyrwyr yn cael eu gorfodi i weithio'n rhan-amser ochr yn ochr â chwrs amser llawn oherwydd diffyg cymorth ariannol. Fodd bynnag, yn hanesyddol mae myfyrwyr iechyd wedi elwa ar lefelau uwch o gymorth ariannol ac yn parhau i wneud hynny. Er enghraifft, mae ein cydweithwyr iechyd yn elwa ar y cymorth mwyaf erioed o £227,000,000[5] ar gyfer addysg a hyfforddiant. Nid yw'n hawdd canfod union ffigurau, ond byddai amcangyfrif bras yn awgrymu bod myfyrwyr y GIG yn cael pum gwaith lefel y cymorth na'u cydweithwyr gofal cymdeithasol.
Bydd myfyriwr GIG arferol yn derbyn bwrsariaeth o tua £33,000-£40,000 yn dibynnu ar incwm y cartref. Mae benthyciadau cynhaliaeth bersonol ar gael i fyfyrwyr sy'n derbyn y swm is. Ychydig iawn o fyfyrwyr y GIG sy'n cymhwyso â dyled sylweddol, ac eithrio ffioedd llety posibl.
Mae myfyriwr israddedig gweithiwr cymdeithasol nodweddiadol yn derbyn bwrsariaeth o £7,500. Mae disgwyl iddyn nhw gymryd benthyciad myfyriwr ar gyfer ffioedd dysgu a benthyciadau cynhaliaeth i oroesi. Bydd gweithiwr cymdeithasol israddedig arferol yn cymhwyso gyda mwy na £40,000 mewn dyled.
Mae myfyrwyr MA gwaith cymdeithasol yn derbyn bwrsari sylweddol o £13,000; fodd bynnag, dydy hyn ddim yn talu ffioedd dysgu. Mae yna reoliadau[6] gan Lywodraeth Cymru sy’n gwahardd myfyrwyr MA rhag cael mynediad at gyllid myfyrwyr a bwrsariaeth ar yr un pryd, er bod y GIG ac israddedigion yn gwneud hynny. Mae'r rheoliadau hyn yn gorfodi gweithwyr cymdeithasol a'u teuluoedd i galedi ac yn rhwystr gwirioneddol.
Beth sydd angen ei newid?
1. Diwygio'r rheoliadau sy'n gwahardd myfyrwyr MA rhag cael cymorth ariannol.
2. Sicrhau bwrsariaeth gyfatebol rhwng bwrsariaeth Gofal Cymdeithasol Cymru a bwrsariaeth GIG (Cymru) i sicrhau cydraddoldeb gwirioneddol- nid yw'n gydraddoldeb i'w gwneud yn ofynnol i fyfyrwyr gwaith cymdeithasol gymhwyso gyda dyled o £40,000-£50,000 i ymgymryd â swydd rôl gwasanaeth iechyd cyhoeddus
3. Sicrhau bod newidiadau'n digwydd mewn modd amserol, i gefnogi gweithlu gwaith cymdeithasol y dyfodol.
[1] Social Worker Workforce Planning 2019 (ADSS/SCW/WLGA)
[2] Social Care Wales- Social Worker Fact Sheet 2020
[3] Fact sheet (SCW) Social work students on the Register 2019&2020
[4] Fact sheet (SCW) Social work students on the Register 2019&2020
[5] Record funding of £227m announced to expand NHS Wales workforce- WG Press Release 07/12/20
[6] The Education (Student Support)(Post Graduate Master Degrees (Wales) Regs 2019